‘N NUWE WOORD
Ek lees elke dag ‘n nuwe Bybel! ‘n Bybel wat ek nog nooit vantevore gelees het nie.
Elke dag.
Ja, dis waar.
Waar kry ek elke dag ‘n nuwe Bybel? Daar bestaan mos net een Bybel.
Verskillende vertalings ja, asook in verskillende tale, maar almal met een Boodskap:
DIE NUWE LEWE.
Ek het ‘n geheim wat ek jou sal vertel. Ek sal jou vertel waar om elke dag ‘n nuwe Bybel te kry:
Elke dag, voordat ek my Bybel oopmaak dan bid ek die volgende:
Here, ek bely my onvermoë om U Woord sinvol te lees.
Sonder U leiding,
U insig en kennis,
verstaan ek nie een enkele woord wat ek lees nie!
Dankie dat U Gees as tolk optree.
Daar waar woorde vir my soos Grieks,
geen sin maak nie,
daar breek U elke woord vir my oop.
Dit bars oop soos ‘n ryp granaat.
Hoe wonderbaarlik soet en sappig,
elke klein korreltjie.
More, kom U weer en elke woord
bars oop soos ryp druiwekorrels.
Die volgende dag proe ek vars,
stroopsoet papajas.
Hoe is dit moontlik Here?
U ken my, baie beter as wat ek myself verstaan.
U weet presies wat ek vandag nodig het.
U Woord is elke dag dieselfde,
tog, kom U en bedien dit op ‘n ander skinkbord aan my!
Vandag proe dit soos granaat, want dis wat ek vandag nodig het.
More, proe dit soos druiwe, want vandag gaan
granate nie die doel dien nie,
Vandag het ek druiwe nodig!
Dankie Here, dat U elke dag
‘n nuwe openbaring aan my gee.
‘n Openbaring wat vandag vir my sin maak.
Elke dag is nuut.
U genade is
elke oggend nuut. – Klaagliedere 3:23
Amen.
Gaan kry jou nuwe Bybel!
Dis heeltmal gratis en verniet!!