LIEFDESBAND
“Hou julle liefdesband met God in stand.
Verwag die ontferming van ons Here Jesus Christus met die ewige lewe as einddoel.”
– Judas 1:21
Hoe verskriklik mooi is hierdie woorde nie?
…..Hou julle liefdesband met God in stand…..
Mooi woorde bly egter net mooi woorde, totdat dit ‘n werkwoord word!
Here, wat het ek vandag gedoen met ons twee se liefdesband?
Ek was vandag ongeduldig Here,
ongeduldig met ‘n ouer dame voor my
in die ry by die supermark se betaalpunt.
Ongeduldig toe sy sukkel om die regte geld
uit haar beursie te tel.
In plaas daarvan dat ek haar help ,
het ek ongeduldig agter haar op my horlosie bly kyk
en hard gesug.
Sy het nog meer op haar senuwees geraak….
Ons twee se liefdesband het skade gely.
Vandag het iemand sy pyn met my kom deel,
ek het emosioneel afgeskakel,
ek wou nie betrokke raak nie.
Ons twee se liefdesband het skade gely.
Laatmiddag, het ‘n moeilike kliënt
my pad gekruis,
ek het my humeur verloor,
dinge gesê waaroor ek spyt is.
Woorde wat ek nie kan terugtrek nie.
Ons twee se liefdesband het skade gely.
Here, ek bely dat ek vandag misluk het om ons
liefdesband in stand te hou.
Ek was roekeloos en het
net aan myself gedink.
Vergewe my Here .
Help my om more die oorvloed wat U my gee
met ander te deel.
Maak my hande sag,
my voete gewillig om U pad te volg.
Vul my hart met U liefde.
Vul dit tot oorlopens toe
sodat ek kan deel
en deel
en dan, slegs dan
sal ons twee se liefdesband
bly staan.
Rotsvas.
Geanker in U Woord.